雙倒水別莊

關於部落格


Hō-ló 走反來 tī chia
  • 2496

    累積人氣

  • 0

    今日人氣

    0

    訂閱人氣

愛我創假?創空卡有影!


Tō teh 躊躇啊,拜五倚中晝接著一通電話,煞予我雄雄心火著,電話下落个時,頭一擺感覺心內彼呢衝磅,想卜隨闖去樓跤提單。


因為手 ni̍h 直直有題目 teh 做,嘛相連紲揣資料 teh 交,khà 來个主理問个,tō是其中个一个題目,彼个題目是對一本日本冊來个,卜寫中產階級消蝕,進前我已經做誠儕圖佮表,分析講咱國無即號問題,毋才即个主理會 khà 來問講:「咁無法度?若共中產階級佔个 pha-siàn-toh 減落,敢做袂到?」


我一起掔聽無,等我聽捌,電話已經掛,一下想,khí-mo·真 bái。


「屁面話!pha-siàn-toh 若特持共減落,當然嘛 naih 落,毋閣若卜創假,恁父袂憖!」


後--來我提主計處个資料,共進前照米國統計个作法放掬,照所得總扯分三份,看戶數按怎分摒,是啦,彼个號做中產階級个部份確實是 niah 落啊,毋閣看即五冬个資料,真心適,中產階級減落个因端,是因為真儕家庭个所得攏走去排入去富裕个彼旁,富裕家庭个數額,比散赤佮中產加加起來,猶閣有加,毋才雖罔「目的」有成,卜 ut 拗恐驚仔真僫哩。


今我已經心頭掠定啊,公司若卜親像頂禮拜五工商時報(註)彼無水準,抹烏漆白,橫柴夯入灶,我會真歡喜提這做攔頭堅辭,而且絕對袂放即件代誌即好收煞。(是講,媒體落眾人喙已經毋是頭一日啊,我是閣會當按怎佮 in 對株哩‧‧‧Orz)


總--是,若無天良,做夥白賊,讀冊卜呢?做人卜呢?


註:八月十八个工商時報,有報兩千 khòng 五年个家庭收支調查,寫著有影會笑破人个喙,誕誤是儕 kah 會驚死一堆蚊仔胡蠅。
相簿設定
標籤設定
相簿狀態