雙倒水別莊

關於部落格


Hō-ló 走反來 tī chia
  • 2496

    累積人氣

  • 0

    今日人氣

    0

    訂閱人氣

第三工 - 踅 打狗市

Chang 暗 tī 愛河邊散步 ê 時,四界烏白行,無張持去看著高雄音樂館 kap 市立歷史博物館,才知原來歷史博物館 tī 飯店 chit-kho·圍 á,行路 ē 到。
舊市役所


原底我 tō kā 高雄市立歷史博物館 當做來打狗 ê 目標之一,kah 是 chiah 近,所以我早頓食飽了後,隨直接走去歷史博物館參觀。


歷史博物館內底,除去有紹介打狗市 ê 歷史,特展 ê 部份,有布袋戲、媽祖文化(旗后天后宮)、228 事件 ê 高雄 kap 高雄/Paris 城市攝影展。


我自來無按算 beh 參觀 siuⁿ 久,nah 知才入去 chi̍t-chām-á,外口 ê 雨 soah 車桶倒,我雨傘 hē tī 飯店,chit 聲無 ta-oâ,只好留 tī 博物館 liâu-liâu-á 看--ah。


博物館內底,有 chi̍t-koá 物件,特別是歷史文件(日本時代 kap 國民政府佔台初期 ê 文書、證件),是別位看 bē-tio̍h--ê,m̄-koh 我印象上深--ê,是對「愛河」chit-ê 名 根頭 ê 說明。


愛河 原底號做「打狗川」,日本佔台了後,tī 大正初期 kā 打狗改寫做高雄,打狗川 mā 改做「高雄川」(另外 1 ê 名號做高雄運河),hit 當陣有真儕遊船公司 tī 河邊招人客做生理,抵好有一間公司營業所 ê khan-pan 寫講「愛河游船所」,因為風篩 kā khan-pan siàn 破--去,kan-taⁿ chhun 「愛河」2 字,koh 加上有 1 對男女 tī 愛河跳港,新聞記者 choaⁿ-á 用「愛河」來寫標題,「愛河」chit-ê 名 m̄-chiah 時行--起-來,替換「高雄川」變做正名。


倚中晝雨 chām,我行 tńg 來飯店,想講 ē 晡 beh 去 toh khah 好,無想著 ē 晡 hām 暗時我 ē-tàng 行 chiah-ni̍h 儕所在。


1 點我 koh 對飯店起行,看過哈瑪星 ê 武德殿 kap 代天宮(mā 是高雄市役所上早 ê 所在)了後,tō 去揣去旗津 ê 渡船頭,chit 中間按怎失路 koh 問路,che tō m̄ 免講--ah,橫直今 á 日已經 m̄ 知 phah-m̄ 見幾擺--ah -______-"
渡船


旗津渡船真心適,ē 層載 o·-to·-bái,頂層載人,1 choā 台票 10 箍銀,真俗,坐 10 分鐘 tō 到對岸。


因為是坐船,無駛車去,tī 旗後(旗津),我著用 kha 行,講實在--ê,旗後天后宮看 soah,廟前街行了,我 tō 已經想 beh 走--ah,因為感覺真無意思,無啥物心適 ê 物件,硬逼 ka-tī 留--落-來,行去 kah 海岸公園,我 koh-khah 想 beh 走,因為有影足失望--ê。


提旗後天后宮來講,明明是打狗上早 ê 廟寺,結果 kan-taⁿ 編做三級古蹟,因端是--啥?我看看--leh tō 臆有--ah,he 廟寺新新新,連內底看--起-來上舊 ê 物件,koh 攏是「民國某乜年」做--ê,已經翻--過-ah ê 款。


Koh-khah 譀--ê,是廟邊 á chhāi 1 塊牌 á,講 beh tī 廟倒旁起 1 間樓 á 厝,樓 á 厝頂 koân beh khiā 1 身(sian)全台灣上大身 ê 媽祖像,a 娘 oeh...@@" Che kám ē 看口得???


旗後天后宮告示
原來旗後 ê 人是用 chit 款心態對待古蹟--ê-oh,真敗害--ah!


反船
海岸公園 tī 我看問題 kāng 款,無彩進前開 hiah 儕錢起 kah 真媠,結果沙埔頂 koân 全糞埽,景觀建物 ê 部份,真儕所在破去、路道積水,沙 kō kah chi̍t 四界,旗津人--ah,恁若心無改,無想 beh 出力維護恁 ê 環境,hō·清氣、麗倒,用正確 ê 觀念尊存古蹟,莫怪旗津 ê 觀光 ē 落衰,我用點外鐘 ê 時間行旗津,m̄-koh 親像 chit 款所在,我 bē koh 想 beh 來--ah。


離開旗津了後,我 koh 揣來到西子灣(Se-á-oân),西子灣是 1 ê 垵(oaⁿ),邊 á tō 是中山大學。


西子灣風景 bē-bái,m̄-koh hām 我去--過 ê 海垵比,西子灣實在無 kài 特殊,尤其是海墘 hē hiah-chē 消湧塊,歹看死死,kám 講咱 ê 政府無別項做法--ah-sìm,我去外國 ê 海岸,iáu m̄-bat 看人按呢創--ê,咱 kám bē-sái 去參考別人按怎保護海岸,koh 兼顧光景?


去西子灣,定著 ài 去英國打狗領事館,che 領事館是台灣頭 chi̍t 間西式洋樓,起了真媠。
打狗英國領事館



城市光廊
暗頭 á 無張持揣著 玫瑰聖母聖殿教堂,che 是全台灣上早起 ê 2 間教堂內底 ê 1 間,m̄-koh 因為無開,而且四 kho·-lìn 轉真 e̍h,無法度斟酌看,所以無留真久,了後,去 tī 中山路 kap 五福路口 ê 城市光廊,講是城市光廊,窮實是高雄未來中央公園 ê chi̍t 細塊 á,用光線 kap 造景,配合咖啡廳 kap 藝術表演,hē 燈光 ê 部份,著暗時 á 來,才看有。


上尾,揣去 kah 六合夜市,雖然已經真悿--ah,m̄-koh 六合夜市自日本時代 tō 真出名,所以想講無去可惜,行 chi̍t-lìn、食食--leh了後,我感覺猶無永和樂華夜市 ê 物件 hiah 好食 :P,總--是人高雄 ê 六合夜市整理 kah 真好勢,khah 闊、有真儕糞埽桶、khah 清氣,chit 點台北大部份 ê 夜市 á 攏 khah 輸。
相簿設定
標籤設定
相簿狀態