雙倒水別莊

關於部落格


Hō-ló 走反來 tī chia
  • 2496

    累積人氣

  • 0

    今日人氣

    0

    訂閱人氣

走閃會社 (第 3 pha)


M̄-koh 借 khiā ê 人客,nā 對 n̍g 深井埕 ê 窗 á 看倒--落-去,tō ē 發現 hia 根底無 siáⁿ 人 teh 整理,kan-taⁿ 看有 kui 組 ê 攝影 ke-si hām 配景 hē kah chi̍t 四界,4, 5 ê 長頭毛、黃頭毛 ê 少年 á 搬起搬落,khiā 中央 1 ê cha-bó· gín-á liam-mi kha 鬆手弄、liam-mi 扭頭 chūn 頷,chim-chiok kā 聽,chín 放送--ê kám m̄ 是 chhèng kah 半天 koân ê 歌星 Lena ê 歌?Hoān-sè 是來 kā 飯店稅地場 hip MTV ê 款。


飯店大廳,大 kho·柯--ê hām 1-ê 矮頓矮頓 (é-tn̍g) ê 中年 cha-bó· oan kah chin 厲害。


「花枝--ê,你 mā khah 拜託--leh,已經 hō·你欠半冬--ah,chit 個月你 koh 出 kāng chit 號步數!Lín 娘--leh,你是 kā 我柯某人當做--siáⁿ?」柯--ê 歹死死,ná 講 ná 逼 oá--過。


花枝--ê 姓花,「花枝」是伊 tī 演藝 kho·-á ê 體號,伊原底無名無姓,但是因為簽 tio̍h Lena chit-ê 金葫蘆,choaⁿ-á 變做 kho·-á 內出名 ê 中人。


花枝--ê 做柯--ê kā háⁿ,半步 lóng 無 soá,kan-ta 用倒手去 loa̍h 伊 khiû-khiû、油油、垂來 tī 肩 kah 頭 ê 頭毛,jiáu chi̍t-ē 頭 pho iā-iā 飛,柯--ê bē-khat-kin 禁氣倒退一步,目 chiu 金金看花枝正手 chhah-koh,khiā 三七步,un-un-á 講:「柯--sàng,你 tō 知知--leh,Hoe-lê ( in 私 kha-ē 叫 Lena 做 Hoe-lê ) 自底用錢 tō 真 siong,大身了後,m̄ 知是壓力 siuⁿ 大 a̍h 按怎,koh khah sái-phún 用;1 冬買 8 台車,ta̍k 頓 lóng beh 食 Ruth's Chris 無 tō 叫 路易十四 送--來,nā 穿--leh,Gucci、Armani 無 tō Chanel,thàn 七開十一,m̄-chiah chit-chām-á 手頭有 khah ân。」花枝--ê 講話 ê 時,目 chiu 對直看柯--ê,lóng 無消閃,食 chit 途--ê,有影 lóng 是硬角。


柯--ê 目眉 chhèng--chi̍t-ē,手攬胸講:「講按呢,Hoe-lê--ê khon-mí-sióng 你 nah m̄ 減 the̍h--chi̍t-koá?」花枝--ê chit 陣目 chiu 看對別位,假仙 hah-hì,「花枝--ê,人 ài 食飯,車 ài 加油,我 ê 人 ta̍k 個月 kā 我領月給轉去飼家--leh,你 m̄-thang siuⁿ 好款,量講阮 chiâⁿ 實 hiah 好 chhńg。」


Nā chit 點花枝真知--leh,名 號做「走閃會社」,其實 chit 陣人 kan-taⁿ 是改途 niā-tiāⁿ,tō 是因為柯--ê 本人 hām 倩--來-ê lóng 是一流 ê pha-pha-lá 鼠,m̄-chiah ē chiah-ni̍h-á 了解 pha-pha-lá 鼠 ê 手路 kap 思考,有才調 kā in 變 (pìⁿ) kah lin-lông-gô,nā 柯--ê beh chhòng 空 beh 反背,Lena 後禮拜 tō 是《意周刊》ê 書皮女主角--ah,時到,hiah-ê a-sa-phú-luh ê 媒體 beh ti̍h sím-mi̍h 款相片 tō 在 in 開條件--ah,Lena nā 倒,花枝 mā hoe-lê--ah。
相簿設定
標籤設定
相簿狀態