雙倒水別莊

關於部落格


Hō-ló 走反來 tī chia
  • 2496

    累積人氣

  • 0

    今日人氣

    0

    訂閱人氣

抵手 (稿四-1)

眠床邊 hit 支桌頭燈 ê 光線,是金 á ê 色水,chhiō tī 柑黃 ê 被單,mā chhiō tī 白 sí-sat ê 床巾頂面,伊 thāng--leh thāng--leh,雙跤開叉 khiā kah 在在,雙手 chhah-koh 小可 ku-ku,chit 陣,伊 ē-tàng kā 倒 tī 眠床頂,雅姿身軀 ê ta̍k 位,頷 á 頸邊 ê hit 粒烏痣,肚臍 ē ê 親像 lêng-liang-á 花 ê khî,hām 伊 ê 表情按怎變換,攏看 kah 明~明。


伊是 chiah-ni̍h-á 致心 teh 試無仝 ê 角度,ná teh 看眠床頂 chit-ê cha-bó·-lâng 按怎 toè 伊 ê 動作,liam-mi 目頭抾襇,liam-mi 目睭瞌 bui、喙 peh 開開,liam-mi haiⁿ kah 聲吊 koân 拖長,親像 khûn 山過莊;liam-mi 長長短短、無 lám 無 le,親像囡 á 哭 chhngh。無意間,伊歸心變做 1 台機械,一時 á 緊 pia̍k-pia̍k,bē 輸拚緊 ê 火車;一時 á 慢 sô-sô,bē 輸葉 á 頂 soá tín 動 ê 刺毛蟲;一時 á chân 深深,親像開 pōng-khang beh kā kn̍g-thàng;一時 á giah 淺淺,親像田嬰 chhih 水 ná 有 ná 無,kah 尾--ah,伊 choaⁿ-á kā 家己 ê 感覺攏 phah 無--去。


「時間 tiām--去-ah。」,上無 倫正 是按呢想--ê,「無是按怎我 ê 感覺 nah ē 攏無--去-ah-leh」,taⁿ kan-taⁿ 有面頭前 chit-ê cha-bó·-lâng teh 因為刺刻來 kùn-kiōng,nā 倫正已經全全麻痺--ah,除去 大粒汗、細粒汗流過皮肉 ngiau-ngiau ê 感覺,伊 sím-mi̍h 攏致覺 bē-tio̍h。


「好--ah!好--ah!人無愛--ah-lah!」雄雄 雅姿 hoah 出聲,倫正聽 tio̍h 伊按呢講,心內 chu-bui,面--ni̍h hiàn 出 kiōng-beh 看 bē 出來 ê 笑神,he 話 ná 親像 teh kā 鼓勵,teh kā 謳咾,伊歸 ê 人精英--起-來,存心出力 koh 趕緊 mé,無外久雅姿 tō koh hiu kah 大聲細聲,雙手 kā 床巾 khiú--chi̍t-ē 歸 ê 走走--出-來,soà--loeh 暴憑 lek 力,choaⁿ-á 放軟,bē 輸雞 kui-á 消--去,無 koh 再 piⁿ-pu̍ih。


總--是倫正 ê 動作無停。


「人已經去第 3 擺--ah,有影已經 thiám--ah。」雅姿猶 teh 喘氣,話講 ê 時,前氣接 bē tio̍h 後氣。


倫正知影伊是頂真--ê-ah,知影 tio̍h 收 soah--ah,伊 kā 身軀 kui-ê phak tī 雅姿頂面,出力 kā 攬--leh,目睭瞌瞌,緊 thāng 緊 thāng,想 beh kā 感覺 chhoē 倒轉--來,伊啥物攏無想,kan-taⁿ 去想 ē 面 he 相 e 相 chiⁿ ê 感覺,伊著 chiah-ni̍h-á 致心致肝去感覺,chit 陣 soah 換伊有小可 thiám-thiám。


「你 nah ē chiah 馬形,無,我 kā 你用含--ê 好--無?」Cha-bó·-lâng ê 手 chhun 來 moa tī 倫正 ê 肩胛頭,長長 ê chéng 甲 真出力 chha̍k 入去伊 ê kha-chiah-phiaⁿ,因為歹喘氣,講話 ê 聲又 koh 親像貓 á 囝 teh 哮,細聲細聲,聽無 siáⁿ 有。


出--來 hit 陣,倫正大大力 suh chi̍t 口氣,kā 面藏入去 雅姿長長 ê 頭 mn̂g 內底,鼻 á tu 來 tī 伊 ê 耳 á ē-kha,直直喘氣,伊 鼻 tio̍h 雅姿甜甜 ê 芳水,kap 流汗 kap 做夥 ê 味。


青定白定,伊感覺 ià--ah,真 ià--ah,ià-siān kah 伊 chih-chài bē-tia̍u。


Chit 號 ià-siān,親像 siān 雨了後日鬚 thàng 過烏雲,koh 親像刀 á 對袋 á 內底 chhiám 倒--出-來,倫正 choāⁿ-siâu 了後原底 gông-gông hîn-hîn,chit 陣 soah 歸 ê 精神--過-來,出力 beh peh 起身。


「等--leh-lah!」雅姿 kā 伊 ê 手 khiú--leh,講 ê 時目睭 iáu 瞌瞌,「你 beh 去 toh?」


「我‧‧‧‧‧」倫正講無啥 ē 出喙,伊 kā 雅姿 ê 手 poé 掉,kā lak tī 塗跤 ê 褲 long--lé,m̄ 知是按怎起猛,āng 聲koh 講,「我無愛--你-ah!」


雅姿聽伊按呢講 choaⁿ-á 笑出聲,對 「koh koh koh」笑 kah 變做 「hah hah hah」,「倫正,你是 iōng 了 siuⁿ 爽 神經線相 phoa̍h--sìm?無張無持講 che 是--siáⁿ?」


「我真正無法度 koh 愛--你-ah。」倫正直直相對雅姿,雅姿目睭 peh--開,sa-bui sa-bui,看--起-來 iáu 笑笑,m̄-koh chín khah sêng 是凊笑,chham 小可 á 無法度了解 ê chi̍t 種表情。


Chiah-ê 話了後 ê tiām 靜,親像有歸十冬 hiah 久,koh 來是天 phah-pú 光進前 he 相連紲 3 點鐘 ê 哭聲,倫正 kā 家己關 tī 便所內底,無開火,khû tī 壁角,面 bi tī 手蹄--ni̍h,頭殼內底罩濛,啥物攏想 bē 起--來,啥物攏想無。
相簿設定
標籤設定
相簿狀態