關於部落格


Hō-ló 走反來 tī chia
  • 2517

    累積人氣

  • 0

    今日人氣

    0

    追蹤人氣

有「蜀」ê 字真惱

講深我 mā 無了解,究真我無漢學 á 底,kan-taⁿ 講 chi̍t 字四常 teh 用--ê,tō 有夠我操煩--ê-ah,chit-ê 字,tō 是 " chi̍t nn̄g saⁿ sì gō· la̍k chhit peh " ê " chi̍t "--字。


Kóng chhim goá mā bô liáu-kái, kiù-chin goá bô Hàn-o̍h-á té, kan-taⁿ kóng chi̍t jī sù-siông teh ēng--ê, tō ū-kàu goá chhau-hoân--ê-ah, chit-ê jī, tō-sī " chi̍t nn̄g saⁿ sì gō· la̍k chhit peh " ê "chi̍t"--jī.


自來我攏量講 che "chi̍t" nā m̄ 是寫做 " 一 " tō 是寫做 " 1 ",按呢寫除去定定 ē m̄ 知 chit 位 tio̍h 讀 " it " ia̍h 是 "chi̍t" 以外,算是 iaú 無太大 ê 問題,橫直看頂 ē 文,beh ioh 有,十分佔九分九,已經真有夠額--ah。


Chū-lâi goá lóng liōng-kóng che " chi̍t " nā m̄-sī siá-chò "一" tō-sī siá-chò " 1 ", án-ne siá tû-khì tiāⁿ-tiāⁿ ē m̄-chai chit-ūi tio̍h tha̍k " it " ia̍h-sī "chi̍t" í-goā, sn̍g sī iaú bô thài-toā ê būn-tê, hoâiⁿ-ti̍t khoàⁿ téng-ē-bûn, beh ioh-ū, cha̍p-hun chiàm káu-hun-káu, í-keng chin ū-kàu gia̍h--ah.


啥人知影自 tī 冬 ê 福州話 blog 看著 "蜀" chit-ê 寫法,koh 對先生 hia 確定 "chi̍t" ê 本字的實是 "蜀" 了後,我 choaⁿ-á 顛倒 m̄ 知 beh 按怎寫,寫 "一" 心內感覺 m̄-tio̍h,寫 "蜀" koh 明其知影大部份 ê 人 ē sa 無,歸氣寫羅馬字 kā "chi̍t"--loeh,夭壽--oh,天公伯--ah,m̄-thang koh hō· 我 ke bat khah 儕漢字才是路--oh!


Siáⁿ-lâng chai-iáⁿ chū tī Doyng ê Hok-chiu-oē blog khoàⁿ-tio̍h "蜀" chit-ê siá-hoat, koh tùi sian-siⁿ hia khak-tēng " chi̍t " ê pún-jī tek-si̍t sī "蜀" liáu-āu, goá choaⁿ-á tian-tò m̄-chai beh án-choáⁿ siá, siá "一" sim-lāi kám-kak m̄-tio̍h, siá "蜀" koh bêng-kî-chai-iáⁿ toā-pō·-hūn ê lâng ē sa-bô, kui-khì siá Lô-má-jī kā "chi̍t"--loeh, iau-siū--oh, Thiⁿ-kong-peh--ah, m̄-thang koh hō· goá ke bat khah-chē Hàn-jī chiah sī lō·--oh!


我 kā 朋友 phah 笑 khoe 講,「chi̍t-ê 中國」tō 是三國 ê 「蜀國」(chi̍t 國)---「蜀漢」(chi̍t Hàn)--lah,che 當然是講笑--ê (撿彩讀做 Sio̍k-hàn ê 款),總--是我 chit 陣 á,有影親像 A 扁,蜀粒頭,兩粒大 XD
Goá kā pêng-iú phah-chhiò-khoe kóng, " chi̍t-ê Tiong-kok " tō-sī Sam-kok ê " Chi̍t-kok "---"Chi̍t Hàn "--lah, che tong-jiân sī kóng-chhiò--ê ( kiám-chhái tha̍k-chò Sio̍k-hàn ê khoán ), chóng--sī goá chit-chūn-á, ū-iáⁿ chhin-chhiūⁿ A-píⁿ, 蜀 lia̍p thâu, nn̄g-lia̍p toā XD

【添註】

橫直 / hoâiⁿ-ti̍t:華語講『反正』,m̄-thang 講做「半暝食西瓜反症」ê 「反症(正)」--oh!
相簿設定
標籤設定
相簿狀態