雙倒水別莊

關於部落格


Hō-ló 走反來 tī chia
  • 2496

    累積人氣

  • 0

    今日人氣

    0

    訂閱人氣

人已經知反省 咱猶 teh 顧烏人

Kóng chiàⁿ-káng--ê, goá si̍t-chāi bô him-sióng Hân-kok-lâng, in lóng chiok kho-thâu, koh chin sioh bīn-phoê, tī in kok, tùi cha-bó·-lâng mā chiâⁿ bô chun-tiōng, chóng--sī, Hân-kok-lâng tùi le̍k-sú hoán-séng ê ióng-khì, hō· Tâi-oân-lâng chi̍t-ē pí, ū-iáⁿ Tâi-oân-lâng sī ū-kàu kiàn-siàu.


講正港--兮,我實在無欣賞韓國人,怹攏足科頭,閣真惜面皮,佇怹國,對查某人嘛誠無尊重,總--是,韓國人對歷史反省兮勇氣,予台灣人一下比,有影台灣人是有夠見笑。


Che í-keng m̄-sī goá thâu-pái khoàⁿ-tio̍h chit-khoán sin-bûn--ah, kū-nî 12-goe̍h chhoe, goá tō chù-ì-tio̍h Hân-kok chèng-hú hoat-piáu 1 phiⁿ tiau-cha pò-kò, thè Bîn-chheng Ha̍k-liân (民青學連) poān-loān-àn sé-chheng oan-óng.


這已經毋是我頭擺看著即款新聞--啊,舊年十二月初,我就注意著韓國政府發表一篇調查報告,替民青學連叛亂案洗清冤枉。


Lán Tâi-oân--leh?Éng-koè hit 50 tang cheh-thoah jîn-koân ê lâng kám ū siū-tio̍h chhú-hoa̍t? Mài kóng--siáⁿ-lah, 228 tô·-sat ê chha̍t-thâu Chiang Khai-shek (蔣介石) tō iáu ū kí-liām-koán (Chháu-thâu-á Biō) tī-leh--leh, Chiang--ê in pē-á-kiáⁿ ê o·-lâng kah taⁿ iáu tī Tâi-oân sì-koè chhāi, koh-khah sī peng-iâⁿ kap ha̍k-hāu chhāi-tio̍h siōng-kài lī-hāi, chit-chām-á kan-taⁿ in-ūi Tiong-kok mûi-thé pàng 1 ê siau-sit, kóng Tân chóng-thóng beh thiah peng-iâⁿ ê o·-lâng niā-tiāⁿ, tō hiah-ni̍h chē lâng teh giâ, m̄-chai sī teh giâ siáⁿ siâu?


咱台灣--哩?往過彼五十冬撮汰人權兮人咁有受著處罰?嘜講--啥-啦,二二八屠殺兮賊頭蔣介石就猶有紀念館(臭頭仔廟)佇哩--哩,蔣--兮怹父仔囝兮烏人佫今猶佇台灣四界在,閣卡是兵營佮學校在了上蓋厲害,即暫仔干凋因為中國媒體放一兮消息,講陳總統欲拆兵營兮烏人爾定,就赫呢儕人 teh 夯,毋知是 teh 夯啥韶?


Chhin-chhiūⁿ Kok-bîn-tóng kap Chhin-bîn-tóng hit-koá thè kiám-kháu-ông kiam to̍k-chhâi-chiá kóng-oē ê pùn-sò (iû-kî sī Chiúⁿ Hàu-lâm / 蔣孝男), goá kan-taⁿ siūⁿ-beh tùi in kóng 1 kù oē: " lín tau sí lâng! "
親像國民黨佮親民黨彼寡替減口王兼獨裁者講話兮糞埽(尤其是蔣孝男),我干凋想欲對怹講一句話:「恁兜死人!」
相簿設定
標籤設定
相簿狀態