雙倒水別莊

關於部落格


Hō-ló 走反來 tī chia
  • 2496

    累積人氣

  • 0

    今日人氣

    0

    訂閱人氣

伊真雀鳥仔性,從到今伊是看毋捌、mā 聽毋捌「小等--一-下」chit 項代誌,伊若到位,我 kan-taⁿ thang 趕緊款待,親像伊 chiah 雀猴性--ê,話是絕對無講第二擺,才無管汰你是 teh 駛車、teh 播田、teh tuh 龜、ia̍h 是走動,橫直 sa 有筆你著緊寫,sa 無筆你著緊記,若記才無好,歹勢,he 是恁兜 ê 代誌。


I chin chhek-chiáu-á-sèng, chêng-kàu-taⁿ i sī khoàⁿ m̄-bat, mā thiaⁿ m̄-bat " sió-tán--chi̍t-ē " chit-hāng tāi-chì, i nā kàu-ūi, goá kan-taⁿ thang koáⁿ-kín khoán-thāi, chhin-chhiūⁿ i chiah chhek-kâu-sèng--ê, oē sī choa̍t-tùi bô kóng tē-jī-pái, chiah bô koán-thài lí sī teh sái-chhia, teh pò·-chhân, teh tuh-ku, ia̍h-sī cháu-tōng, hoâiⁿ-ti̍t sa ū pit lí tio̍h kín siá, sa bô pit lí tio̍h kín kì, nā kì-châi bô hó, pháiⁿ-sè, he sī lín tau ê tāi-chì.


雖然伊生成 chiah 孽,我猶原 tio̍h 姑情--i,無法度,伊 hia 有我袂使無 ê 物,若伊喊--一-聲,重眠睏mā 著 精神--起-來,緊 ai-i-sa-chuh,悿佫會呼雞 袂歕火,mā 是 tio̍h phe 命 koh toè,因為漏勾去永永是我 ê 損失,在伊是無螫皮--得。


Sui-jiân i seⁿ-sêng chiah gia̍t, goá iû-goân tio̍h ko·-chiâⁿ--i, bô-hoat-tō·, i hia ū goá bē-sái bô ê mi̍h, nā i hiàm--chi̍t-siaⁿ, tāng-bîn-khùn mā tio̍h cheng-sîn--khí-lâi, kín ai-i-sa-chuh, thiám kah ē kho· ke bē pûn hoé, mā-sī tio̍h phe-miā koh toè, in-ūi làu-kau--khì éng-éng sī goá ê sún-sit, chāi i sī bô-chhioh-phoê--tit.


講我恨--伊,che koh 是 beh 對 toh 說起,想來想去,我甘願猶會喘氣 ê 日子,逐工 hō· 伊叫喙,是講,真好玄伊對別人,是毋是 mā chiah gâu 激官氣。


Kóng goá hīn--i, che koh sī beh tùi toh-ūi soeh-khí, siūⁿ lâi siūⁿ khì, goá kam-goān iáu ē chhoán-khùi ê ji̍t-chí, ta̍k-kang hō· i kiò-chhùi, sī kóng, chin hó·ⁿ-hiân i tùi pa̍t-lâng, sī m̄-sī mā chiah gâu kek-koaⁿ-khì.


Chit-ê chia̍p 愛 tī 我睏眠時間來攪吵,koh chang 無伊寮仔門 ê 大--ê,有影袂堪得無 kā 惜略,幾工 á 無閒,無 hām 伊 saⁿ 謔 niā-tiāⁿ,taⁿ 著急揣--伊,soah 揣伊袂著。


Chit-ê chia̍p ài tī goá khùn-bîn sî-kan lâi kiáu-chhá, koh chang bô i liâu-á-mn̂g ê toā--ê, ū-iáⁿ bē-kham-tit bô kā sioh-lio̍h, kúi-kang-á bô êng, bô hām i saⁿ-gio̍h niā-tiāⁿ, taⁿ tio̍h-kip chhoē--i, soah chhoē i bē tio̍h.


友--ê-ah,啥物時陣才 koh 來我 chia 橫橫翱?若無你,故事是講袂落!
Iù--ê-ah, siáⁿ-mi̍h sî-chūn chiah koh lâi goá chia hûiⁿ-hûiⁿ-kō ? Nā bô lí, kò·-sū sī kóng bē lo̍h !

【添註】

走動/cháu-tōng:去便所 ê 意思。
相簿設定
標籤設定
相簿狀態