關於部落格


Hō-ló 走反來 tī chia
  • 2501

    累積人氣

  • 0

    今日人氣

    0

    追蹤人氣

Dogme 95

Hit-tang-chūn 想講,che 電影自頭 kah 尾 lóng chin「tiām」,ū ê 所在明其知 phoè koá 音樂 ē khah 有力水,i kan-kan m̄-chham 另外 ê 聲音,全全現場錄音,有夠「自然」。

Hit-tang-chūn siūⁿ-kóng, che tiān-iáⁿ chū-thâu-kah-boé lóng chin "tiām", ū ê só·-chāi bêng-kî-chai phoè koá im-ga̍k ē khah ū la̍t-chúi, i kan-kan m̄-chham lēng-goā ê siaⁿ-im, choân-choân hiān-tiûⁿ lio̍k-im, ū kàu "chū-jiân".

Koh 來就是有 1 景,主角 Anna (Ann Eleonora Jørgensen 出演) tī 辦公室 hām i ê 助手話講 soah,鏡頭 àn Anna beh soá 去門 chhùi ê 時,bô-tiuⁿ-tî choaⁿ-á hiàn kah chiâⁿ 厲害,我 hit-tang-chūn ū-iáⁿ 想 lóng bē-hiáu,he 攝影機 kám m̄-sī 裝 tī 鐵枝頂 koân soá tín-tāng--ê?Tō 準敗馬,監督 soah連 NG 重 hip tō 省--起-來,有影怪奇--ah。

Koh lâi tō-sī ū 1-kéng, chú-kak Anna(Ann Eleonora Jørgensen chhut-ián) tī pān-kong-sek hām i ê chō·-chhiú ōe kóng soah, kiàⁿ-thâu àn Anna beh soá khì mn̂g-chhùi ê sî, bô-tiuⁿ-tî choaⁿ-á hiàn kah chiâⁿ lī-hāi, goá hit-tang-chūn ū-iáⁿ siūⁿ lóng bē-hiáu, he liap-iáⁿ-ki kám m̄-sī chng tī thih-ki téng-koân soá tín-tāng--ê ? Tō chún pāi-bé, kàm-tok soah liân NG têng hip tō séng--khí-lâi, ū-iáⁿ koài-kî--ah.

電影 soah-kó· beh 睏進前,我 koh 想想 kui 大 thoaⁿ,想看監督是 beh 表現--siáⁿ,chit-ê 戲文 kap hit-ê 戲文是做 siáⁿ-mi̍h 款 sio 對比,DVD 盒 á 頂 ê 紹介 iū-koh 是 án-choáⁿ 烏白寫,想 kah 是有理 koh 有路、蓮花 chiâⁿ 寶鏡,àn-sn̍g beh 寫評論--ah,路尾 chiah chai-khang,chit-chhut 電影原來是 Dogme 95 siōng 新 ê 作品--oh,我你 le,原來我根底 m̄ 知 ka-tī 看 tio̍h--siáⁿ,原來 hit-ê giâu-gî kap hit-ê 怪奇 lóng 是 ke--ê,人講「chia̍h 肉 chia̍h 三層,看戲看亂彈」,koh 講 tio̍h 有影 á 有影 -_____-

Tiān-iáⁿ soah-kó· beh khùn chìn-chêng, goá koh siūⁿ siūⁿ kui-toā-thoaⁿ, siūⁿ-khoàⁿ kàm-tok sī beh piáu-hiān--siáⁿ, chit-ê hì-bûn kap hit-ê hì-bûn sī chò siáⁿ-mi̍h sio-tùi-pí, DVD a̍p-á téng ê siāu-kài iū-koh sī án-choáⁿ o·-pe̍h-siá, siūⁿ kah sī ū-lí koh ū-lō·, liân-hoe chiâⁿ pó-kiàⁿ, àn-sn̍g beh siá phêng-lūn--ah, lō·-boé chiah chai-khang, chit-chhut tiān-iáⁿ goân-lâi sī Dogme 95 siōng-sin ê chok-phín--oh, goá lí le, goân-lâi goá kin-té m̄-chai ka-tī khoàⁿ-tio̍h siáⁿ, goân-lâi hit-ê giâu-gî kap hit-ê koài-kî lóng-sī ke--ê, lâng kóng " chia̍h bah chia̍h sam-chân, khoàⁿ-hì khoàⁿ lān-tân", koh kóng-tio̍h ū-iáⁿ á ū-iáⁿ -_____-

無法度--leh,he nā m̄-sī hò·ⁿ-hiân 去 chhiau 資料來看,我 hoān-sè kui 世人 mā bē chai-iáⁿ Dogme 95 是 sím-mi̍h 碗糕米 so。
Bô-hoat-tō·--leh, he nā m̄-sī hò·ⁿ-hiân khì chhiau chu-liāu lâi khoàⁿ, goá hoān-sè kui-sì-lâng mā bē chai-iáⁿ Dogme 95 sī sím-mi̍h oáⁿ-ko bí-so.


【一篇幾 ā 詞 ê 添註】


m̄-bat-ba̍k / 毋捌目<華語>有眼無珠、眼拙。

pāi-bé / 敗馬<華語>出軌、失敗、拋錨、故障。
相簿設定
標籤設定
相簿狀態